Дўстлик ришталари янада мустаҳкамланмоқда​

Ўзбек ва қозоқ элининг тарихи, тили, маданияти ва қадриятлари ўхшаш, халқларимиз азалдан бир-бирига елкадош бўлиб яшаб келади. Бу яқинлик бугунги кунда давлатлараро ҳамкорликка мустаҳкам асос бўлмоқда. Мамлакатлар ўртасидаги муносабатлар 1998 йилда имзоланган Ўзбекистон Республикаси билан Қозоғистон Республикаси ўртасида Абадий дўстлик тўғрисидаги шартнома ҳамда 2013 йилда имзоланган Ўзбекистон Республикаси билан Қозоғистон Республикаси ўртасида Стратегик шериклик тўғрисидаги шартнома асосида тараққий этмоқда.

Икки мамлакат ўртасидаги яқин қўшничилик, стратегик шериклик муносабатларини янада мустаҳкамлаш, ҳудудларнинг саноат салоҳияти ва имкониятлари тўғрисида ўзаро маълумот алмашиш, тўғридан-тўғри ҳамкорлик қилиш ва истиқболли йўналишларни белгилаб олиш мақсадида ташкил этилган ушбу форумга Қозоғистондан ва мамлакатимиз вилоятларидан ишбилармон доира вакиллари ташриф буюрган.

Ўзбекистон – Қозоғистон иккинчи ҳудудлараро ҳамкорлик форуми доирасида учта шуъба йиғилиши, хусусан, “Ишлаб чиқаришда қўшма лойиҳаларни амалга ошириш орқали чегарадош ҳудудларда инвестицион ҳамкорлик истиқболлари”, “Агросаноат секторини ҳамкорликда ривожлантириш” ҳамда “Инсон капиталини ривожлантириш: етакчилик асослари” мавзуларида мунозаралар бўлиб ўтди. Икки мамлакат вазирлик, идоралари масъул ходимлари, ҳудудлар, ташкилотлар ва компаниялар раҳбарлари, иқтисодчи олимлар маърузалари тингланди.

– Ушбу форум ҳар икки томон учун бирдай фойдали, – дейди Қозоғистон Республикаси савдо ва интеграция вазири ўринбосари Кайрат Торебаев. – Ўзбек – қозоқ тадбиркорлари азалдан ҳамкорлик қилиб келган ва бундан давлатларимиз ҳам манфаатдор. Мамлакатларимиз ўртасидаги муносабатлар фаоллашиши натижасида 2018 йил ноябрь ойида Чимкент шаҳрида биринчи Ўзбекистон – Қозоғистон ҳудудлараро ҳамкорлик форуми бўлиб ўтди. Анжуман доирасида кўплаб савдо-инвестициявий шартномалар, ҳудудлараро муносабатларни ривожлантириш бўйича келишувлар имзоланди. Шундан буён ўтган икки йил мобайнида ўзбекистонлик шериклар билан савдо-иқтисодий муносабатларни ривожлантириш, транспорт-логистика соҳасидаги ҳамкорлик, ҳудудлар даражасидаги ўзаро алоқаларни кенгайтириш ва бошқа масалаларда аниқ ижобий натижаларга эришдик.

Сўнгги йилларда ҳудудлар ўртасида савдо-иқтисодий, инвестициявий ва туристик алоқаларни ривожлантириш мақсадида маҳаллий раҳбарлар бошчилигидаги ишбилармон доиралар вакиллари ўртасида ўзаро ташриф алмашиниш амалиёти йўлга қўйилди. Ташрифлар доирасида бизнес форумлар ва ҳудудларда ишлаб чиқарилаётган маҳсулотлар кўргазмалари ўтказиб келинмоқда.

Халқаро форум доирасида чегарадош ҳудудлар бизнес вакиллари иштирокида контактлар биржаси ўтказилди, савдо-иқтисодий ва инвестициявий шартномалар имзоланди. Икки томонлама муносабатларни ривожлантириш бўйича келишувларга эришилди.

– Биз 2011 йилдан буён курка гўшти етиштириш ва қайта ишлаш билан шуғулланамиз, – дейди қозоғистонлик тадбиркор Мурат Тоғаев. – Корхонамизда ҳар йили ўн минг тонна курка гўшти етиштирилади, шунинг ярмидан кўпи қайта ишланади. Ҳозир курка гўштидан 85 турдаги маҳсулот етиштиришдан ташқари, ушбу парранда терисини қайта ишлаб, тайёр маҳсулот сифатида савдога чиқармоқдамиз. Ўзбекистонлик тадбиркорлар билан ҳамкорликни йўлга қўйганимизга бир йилдан ошди. Корхонамиз Россия, Беларусь каби давлатлар билан ҳам ҳамкорлик қилади, бироқ энг яқин қўшнилар билан савдо қилиш жуда қулай. Бугун яна бир қатор фирмалар билан йилига жами 1000 тонна курка гўшти етказиб бериш бўйича шартнома имзоладик. Ушбу форум биз учун жуда манфаатли ва самарали бўлди, деб бемалол айта оламан.

Халқаро форум доирасида Ўзбекистон ва Қозоғистон саноат, қишлоқ хўжалиги маҳсулотлари кўргазмаси ҳам ташкил этилди. Кўргазмада икки мамлакатда ишлаб чиқарилаётган қишлоқ хўжалиги маҳсулотлари, қурилиш моллари ва техникалари, жамоат транспорти, замонавий енгил автотранспорт воситаларидан тортиб енгил саноат маҳсулотларигача намойиш этилди. Иштирокчилар ўртасида импорт ва экспорт шартномалари тузилди.

Тадбир нафақат янги ҳамкорлар топиш ва улар билан алоқа ўрнатиш, янги бозорларни эгаллаш ҳамда инвестиция киритиш ёки жалб қилиш учун ажойиб имконият яратади, балки халқларимиз ўртасидаги кўп асрлик дўстона ва яхши қўшничилик ришталарини янада мустаҳкамлашга ҳам хизмат қилади.