Версия для слабовидящих

2020 йил glavnaya Янги Ўзбекистон

Президент сув тошқинидан зарар кўрган ҳудудда қурилган «Янги Ўзбекистон» маҳалласини бориб кўрди

Президент Шавкат Мирзиёев Сардоба сув омборидан зарар кўрган ҳудудлардаги бунёдкорлик ишлари билан танишиш мақсадида Сирдарё вилоятига келди. Давлат раҳбари «Янги Ўзбекистон» маҳалласида бўлиб, «Агар халқимизга маъқул бўлса, бундай уйларни бошқа ҳудудларда, аҳоли зич шаҳарларда ҳам қурамиз», — деди.

Ўзбекистон президенти Шавкат Мирзиёев Сардоба сув омборидан зарар кўрган ҳудудларда олиб борилган бунёдкорлик ишлари билан танишиш мақсадида Сирдарё вилоятига келди. Бу ҳақда давлат раҳбари матбуот хизмати хабар қилди.

Қайд этилишича, техноген офат рўй берган учта ҳудудда 50 гектар майдонда 86 та 5 қаватли уй-жой барпо этилди. Хусусан, Сардоба тумани «Дўстлик» маҳалласида 37 та, Мирзаобод тумани «Ҳақиқат» маҳалласида 40 та ҳамда Оқолтин тумани «Навбаҳор» маҳалласида 9 та уй-жой қурилди. Уларда жами 2 минг 640 хонадон бор. Президент дастлаб Мирзаобод туманидаги «Ҳақиқат» маҳалласида бўлди.

«Сув тошқини жуда катта талафот бўлди. Ҳам фожиа оқибатларини бартараф этиш, ҳам қисқа муддатда одамларни рози қилишимиз керак эди. Бунга унча-мунча давлатнинг дош бериши ўзи бўлмайди. Ҳар бир одам билан гаплашдик. Вазирликлар, ҳудудларни жалб қилиб, тезкор иш ташкил этилди. Совуқ кунларга қолдирмасдан, оилаларни уй билан таъминлашга эришдик. Энг катта масала — одамларнинг кўнглидаги ғашлик кетди, улар рози бўлди», — деди Шавкат Мирзиёев.

Илгари бу жойлардаги кўп уйларда табиий газ йўқ эди. Энди газ, сув, электр энергияси ва бошқа коммуникациялар билан таъминланган. Яна бир муҳим томони — янги уй эгаларининг аввалги ҳовлилари ҳам ўзларида қолди.

Давлат раҳбари ўша қийин кунларда бутун халқимиз жипслашиб ҳаракат қилганига катта эътибор қаратди.

«Бутун мамлакатимиздан мутахассислар келди. Бу ерда Қорақалпоғистон ва ҳар бир вилоятнинг ўз кўчаси бор. Қудратимиз борлигига, бирлашсак, меҳрли бўлсак, кўп ишларни амалга оширишимизга ҳамма инонди», — дея таъкидлади Шавкат Мирзиёев.

Бу маҳалла «Янги Ўзбекистон» деб номланган.

«Янги Ўзбекистон» дейилганида ҳам маъно бор. Агар халқимизга маъқул бўлса, бундай уйларни бошқа ҳудудларда, аҳоли зич шаҳарларда ҳам қурамиз. Ҳар бир мавзе ёнида иш ўринлари ҳам ташкил этамиз. Умуман олганда, қуриш ва яшаш маданиятимиз ўзгариши керак», — деди Президент.

Янги мавзеда маҳалла гузари, дўкон, кутубхона, болалар майдончалари барпо этилган. Уйларга хизмат кўрсатувчи сервис компанияси ташкил қилинган.

Турар жойларни эксплуатация қилиш тизимини самарали йўлга қўйиш бўйича кўрсатмалар берилди.

Фото

Print Friendly, PDF & Email
loading