2020 йил glavnaya Янги Ўзбекистон

Президент топшириғи амалда

Коронавирус пандемиясини енгиб ўтишда барча аҳилликда, белгиланган тартиб-интизомга амал қилиши зарур.
Жорий йил 3 апрель куни Президентимиз раҳбарлигида бўлиб ўтган видеоселектор йиғилишида карантин шароитида аҳолини зарур озиқ-овқат маҳсулотлари билан таъминлаш борасидаги ишларни уюшқоқлик билан ташкил этиш юзасидан муҳим вазифалар белгилаб берилди.

Андижон туманида ҳам ана шу вазифалар ижросини таъминлаш мақсадида туман ҳокими Улуғбек Исомидинов раҳбарлигида Ишчи гуруҳ тузилди.

Ишчи гуруҳ томонидан мазкур йўналишдаги ишларни тизимли амалга ошириш бўйича чора-тадбирлар амалга оширилмоқда. Хусусан, карантин шароитида аҳолини энг зарур озиқ-овқат маҳсулотлари билан узлуксиз таъминлаш мақсадида кўчма автодўконлар ташкил этилди.

Бугунги кунда 30 дан ортиқ ана шундай кўчма автодўконлар тумандаги мавжуд 77 маҳаллага бориб хизмат кўрсатмоқда.

– Карантин шароитида автодўконларнинг ташкил этилганлигидан маҳалламиз аҳли жуда хурсанд, – дейди тумандаги Пистамазор маҳалласида яшовчи меҳнат фахрийси Турсиной Ҳомидова. – Бу билан оғиримиз енгил бўлди, бозорга бориб тирикчилик учун турли маҳсулотлар олиб келиш муаммосидан қутулдик. Бунинг учун Президентимизга, ҳукуматимизга раҳмат.

Кўчма автодўконлар фаолияти карантин ҳамда коронавирус инфекцияси тарқалишининг олдини олиш бўйича белгиланган барча тартиб-қоидаларга тўла амал қилган ҳолда олиб борилмоқда.

Ф.УБАЙДУЛЛАЕВ, З.УМРРЗОҚОВ (сурат), ЎзА