Ўзбекистон Республикаси Вазирлар маҳкамаси ҳузуридаги Санитария-эпидемиология назорати давлат инспекцияси бошлиғи, Республика бош давлат санитария инспектори Нурмат Отабеков бугун коронавирус аниқланган беморлар аҳоли орасида бўлмагани, карантинда сақланган вақтда уларда вирус аниқлангани ҳақида баёнот берди.
– Коронавирус билан рўйхатга олинганлар сони 2020 йил 19 март куни эрталаб 9:00 ҳолатига кўра, Ўзбекистон Республикасида 23 нафарга етди. Албатта, бу рақам кечагига нисбатан бир мунча фарқ қилгани учун одамларни хавотирга солиши мумкин. Лекин бир жиҳатни айтиб ўтиш керак: бу Франция, Лондон, Дубай ва Туркиядан келган фуқароларимизни тиббий кўрикдан ўтказиш натижасида аниқланмоқда. Уларнинг барчаси дастлабки кунлардан бошлаб алоҳида карантинга олинган эди ва тиббий кузатув остида бўлиб келишмоқда. Шунинг учун бу кенг аҳоли қатламига тарқалган деган хавотирга ўрин йўқ.
Бундай тадбирлар ҳукуматимиз, соғлиқни сақлаш тизими ва барча ташкилотлар томонидан назоратга олинган.
Бугунги кунга қадар 9 минг 100 дан ортиқ одамни назорат остига олдик. 6 мингдан кўпроқ юртдошимиз саломатлиги кафолатлангани учун уйига жавоб берилди. Ҳозирги кунда 2 минг 300 фуқаро карантин муддатини ўтаяпти. Давлат чегаралари ёпилган. Темир йўл, автомобиль транспортлари ҳаракати чекланган. Шу билан биргаликда хорижий мамлакатлардаги юртдошларимизни олиб келиш тадбирлари давом этмоқда.
Уюшган ҳолда келган халқимиз учун алоҳида стационар шароитда, якка тартибда келганлар учун уй шароитида карантин тадбирлари татбиқ этиляпти. Энг асосийси бу касаллик учун ташхис қўйиш имконияти бўлган диагностикумлар, ҳимоя ва дезинфекция воситалари, шифохоналарда ўринлар захираси яратилган.
