Миллатлараро муносабатлар ва хорижий мамлакатлар билан дўстлик алоқалари қўмитасининг Америка Қўшма Штатларида истиқомат қилаётган ватандошларимиз билан алоқалари тобора ривожланиб бормоқда. Айниқса Чикаго шаҳридаги “Ўзбек-Америка” жамияти бу йўналишда карвонбошилик қилмоқда.
Қўмита ва Жамият ҳамкорлиги натижасида ўтган йиллар давомида АҚШдаги ватандошлар фарзандлари ва Ўзбекистон мактаб ўқувчилари ўртасида иншолар танловининг ўтказилиши (2018 йил, Тошкент, Жиззах, Самарқанд, Қашқадарё вилоятлари бир қанча мактаб ўқувчилари ўртасида), 2019 йилда Ўзбекистон делегациясининг АҚШга хизмат сафари чоғида Чикаго шаҳридаги “Ўзбек-Америка” жамияти маркази фаолияти билан учрашилиши, 2019 йилда АҚШдаги ватандошларнинг 20 га яқин фарзандлари учун “Ёшлик” оромгоҳида 2 ҳафталик лагер ташкил этилганлиги ҳамда биргаликда 10 га яқин онлайн учрашувлар ўтказилганлиги фикримизнинг далилидар.
Таъкидлаш жоизки, кейинги йилларда америкаликларнинг ҳам Ўзбекистонга бўлган қизиқиши тобора ортиб бормоқда. Бунга мисол сифатида Буюк адибимиз Абдулла Қодирийнинг “Ўткан кунлар” романини америкалик таржимон Марк Риз томонидан инглиз тилига таржима қилиниб, “Bygone days” номи остида нашрдан чиқарилганини мисол қилиш мумкин. Янги китобнинг илк нусхалари АҚШдаги давлат ташкилотлари, етакчи олий таълим муассасалари ва ушбу мамлакатда аккредитациядан ўтган дипломатик корпус вакилларига тарқатилди. У АҚШнинг энг йирик кутубхонаси – Конгресс кутубхонаси каталогига киритилди. Шунингдек, ушбу асар e-book шаклида ҳам чоп этилган.
Марк Риз 2017 йилда пойтахтимизнинг Самарқанд дарвоза маҳалласидаги Абдулла Қодирий яшаб ижод этган хонадонда бўлиб, адиб ижодий меросини чуқур ўрганган. Таржимон ушбу кўламдор романни инглиз тилига ўгириш учун 15 йилдан ортиқ вақт сарфлаган ва 660 бетдан иборат асар америкалик ўқувчиларга тушунарли бўлиши учун унга 400 дан ортиқ тушунча ва изоҳлар ёзган.
Мазкур китоб АҚШдаги “Ўзбек-Америка” ватандошлар жамияти раиси Олим Шариповнинг бевосита ҳаракатлари орқали Миллатлараро муносабатлар ва хорижий мамлакатлар билан дўстлик алоқалари қўмитасига тақдим этилди. Ушбу китоб орқали америкаликлар бизнинг бой маданий меросимиздан хабардор бўлишади, миллий анъана ва урф-одатларимизни билиб олишади, Абдулла Қодирий каби адибларимиз ҳақида маълумотларга эга бўлишади.
