Мамлакатимизнинг Украинадаги элчихонаси томонидан Ўзбекистон Республикаси Вазирлар Маҳкамасининг Давлат тилини ривожлантириш департаменти ташаббуси билан янги таҳрирда чоп этилган «Ўзбек тилининг изоҳли луғати»нинг тақдимот маросими бўлиб ўтди, деб хабар бермоқда “Дунё” АА мухбири.
Тадбир Украина мусулмонлари диний идораси қошида ташкил этилган “Ал-Иршад” мактабида дипломатик ваколатхона ва ўзбек диаспораси вакиллари, ушбу мактаб ўқитувчи ва ўқувчилари иштирокида ўтказилди.
Тақдимот доирасида мактаб директори Руслан Ткачукка 5 жилдли янги таҳрирдаги «Ўзбек тилининг изоҳли луғати» ҳамда Ўзбекистон маданияти ва тарихига оид китоблар топширилди. Шу билан бирга, йиғилганларга Ўзбекистон Президенти томонидан ўзбек тилини ривожлантириш ва кенг тарғиб этиш юзасидан олиб борилаётган ишлар юзасидан маълумот берилди.
Шу ўринда мактаб директори Р.Ткачук тақдим қилинган китоблар учун ўз миннатдорлигини билдириб, давлатимиз раҳбарияти томонидан ушбу соҳада олиб борилаётган сиёсатни тўлиқ қўллаб-қувватлашини ҳамда Президентимизнинг ташаббуслари дунёнинг бошқа мамлакатлари учун ҳам ўрнак эканини қайд этди.
