Урумчи-Тошкент йўналиши бўйича парвоз қилган авиарейсда ХХР дан визасиз кириш тизими бўйича келган илк меҳмонлар Тошкент халқаро аэропортида Туризмни ривожлантириш давлат қўмитаси вакиллари томонидан кутиб олинди.
Қизиғи шундаки, Ўзбекистон Республикаси чегарасидан визасиз ўтган биринчи Хитой фуқароси Ли Жи Лин Ўзбекистонга инвестиция киритиш мақсадида юртимизни яқиндан ўрганиш учун ташриф буюрган экан.
“Сўнгги йилларда Ўзбекистонда барча соҳаларда катта ўзгаришлар бўлаётганини эшитиб, мамлакатингизга бизнес туризми бўйича ташриф буюрдим, лекин бу даражада чиройли кутиб олишларини кутмаган эдим. Ўзбекистон ҳақида ҳозирча етарлича билимга эга эмасман, лекин ташрифим давомида кўп нарсаларни билиб олишга умид қиламан. ХХР фуқаролари учун мамлакатингизга визасиз кириш тизимининг йўлга қўйилиши хитойликларга жуда катта имкониятлар яратади. Шахсан мен Хитойнинг Шаньдун провинциясидаги катта компания директориман. Шу сабабли мамлакатингизни ўрганиб, унга катта инвестиция киритишни режалаштирмоқдаман. Мамлакатингизда визасиз кириш тизимининг татбиқ қилингани, албатта, яхши янгилик бўлди. Ўйлайманки, бундан кейин Ўзбекистонга келадиган хитойликлар сони ортиб боради”, дейди Ли Жи Лин.
Туризимни Ривожлантириш давлат қўмитаси хабарида қайд этилишича, Ўзбекистон Республикаси Президентининг 2019 йилнинг 12 сентябрдаги 5819-сонли Фармонига асосан 2020 йилнинг 1 январидан бошлаб Хитой Халқ Республикаси фуқаролари учун 7 кундан кўп бўлмаган муддатга Ўзбекистонга визасиз кириш имкони яратилган эди.
